على عمرك يمر الحلم وتتشقق بك جفونك=وتفيض ا بك الوجيه (بلا) ويرفرف فيك كراسك
(وتتخشب) لأحلام السنين ورغبة ظنونك=و(تتكبرت) بك أطرافك تحكك.. يشتعل راسك

تنفي وجيه وتنفي داخل البال =فيك يتمرّغ طيب يطفي عفنها
مزتك عبره ومتلى فيك موال = ودها تكنك .. تكفا ياخوك كنها
كسرت روحك تبني لغيرك ظلال =بك خانت الأرواح يا حسين صنها
يا حسين مايشكي من الوقت رجال=أنا أعرف أرجالٍ شكى الوقت منها
النفس مهره وموتها طرد الأهوال=أبلا رسن تطرد وغيرك رسنها
لو لـ النوايه وجيه يا طيب الفال=تيقن جميع الناس ويموت ظنها
ريحت فعلك وأركضت فيك الأقوال =لو أطعنتك الناس فعلك طعنها
متأقلمٍ بالوقت ياخوك الأنذال=والأ الأصايل أشهد أنك كفنها
أزوال مرينا ........ومرت بنا أزوال=لا ثمنتنا ولا عرفنا ثمنهااااااا
مر الزمان وشفت أنا ألوان و أشكال =بالوقت شفت الناس تلعن زمنها
وشلون عاقل يحسبك أنت رجال=ونفسك بها مليون فارس سكنها

قصيدي وان سجا يقعد نعاسي بأول أنشاده=ألين أشرب تناهيد المساجد ثم أقعدها
صباح البنت لا شعشع فضاها من سنا قلاده=صباح النبت لا مالت شموس وهب ناهدها
يروح الشاعر لقبر القصيده بروح ميلاده=ويدفن روحه في قبر القصيده ثم يولدها
وتتنفس هوى الحبر الطهور وتنفث أبعاده=ويقطع من حزن موته مزن صوته يمهدها
يهزهزها على جرح الصهيل وترمح أعناده=ويشعل هقوة ٍ تنثر جمر في كبد ناقدها
تمز الروح وتكن الولد في قهوة أجداده=تصبه طيب لاعاث النذل بدلال قاصدها
فضاها حمحم الهيل العتيق بدلة أجواده=ظماها تمتم الشيح العتيق بظل جاحدها
تجي أرحم من الدمعه بنفس الوقت جلاده=تجي بأجهادي مطواعه تجي مطواعه وأجهدها
تجي دموع ٍ من عيون الصلاه بروح سجاده=تجي عيون ٍ من دموع الصلاه بروح ساجدها
مثل طفل ٍ يحب أمه تحت تكبيرة أعياده=تفوح أمه رضا لا شب حنينه من يعايدها
مثل قرم أستظل بدلته والشمس وقاده=ويغمس كل فناجيله في صدر الشمس يوقدها
عليها الله إذا شافت صدور الأرض نهاده=تصب الأرض في فم السما تروي تنهدها
تطق الغيمه لو حتى المطر ماطق ميعاده=تطق وينثر أطفال المطر سكين راعدها
شريت النفس أنا أدري هم يجون أكثار زهاده=ونفسي لوتبيني أشري لها والله لجلدها
عبدت الله من شفت الدينار وشفت عباده=عبدت الله من شفت الحريم وشفت عابدها
عبدت الله من شفت الأصيل إن خان بجواده=عبدت الله من شفت الحياه تدوس سيدها

شاعر وتنبض خلوته طهر وصلوات وعباد=ماقد تميع حشمة ٍ للي هدته قيادها
شامخ وربي مانفتح صدره لك إلا يالجياد=وماخلقت كفوف ٍ تدق في ظله عفن اوتادها
من لابة ٍ هي نارها تزفر ولا تنجب رماد=وشلون تطفي ياخبل لابه حطبها حفادها!!
غبت أتشرد بالورق أبني من جروحي بلاد=مثل العزاوي لاحرقت دم لهقاوي جدادها
في ناس تمشي بيننا فقر ودقايقها جهاد=أف من شعور ٍ مافتح عينه وشاف جهادها
وفي ناس نور وجيهها هو سر طاقتها السواد=بالوجه نور وبالصدر جثه عتقنا حدادها
وفي ناس نور وجيهها من الرحم حتى المهاد=ماترضع الظلم العفن لو الدهر جلادها
أشوف من فينا عثر ويقول اهي كبوة جواد!!=ابك الأصايل ما كبت إلا برداة أسيادها
لو الأوادم مثله ومتعاند باسم العناد=كان القبايل ما سقت رحمه بصدر أحفادها
أشعل قصيده بالمسى وأشم خيانات العباد=وأطفيها في جوع النسى وأبكي على أولادها