يا الله يا عالـم جميـع الخفيـات= تعلـم خفيـات النفـوس وعدهـا
بيدك وتوفيقك تحصـل الكرامـات=ياللي تديم لنعمتـك مـن حمدهـا
أسالك التوفيـق والخيـر بالـذات=ونفسي عساها تهتني في سعدهـا
من بعدها يا محكميـن القـرارات= سحب الأماني قام يـرزم رعدهـا
ولاحت بروق المجد عكس الدعايات= وتحققـت لأهـداف محـدٍ نقدهـا
نلت الشرف من يوم قدمت الابيات= مع الحرار اللـي ينومـس هددهـا
أهل الشعر وأهل الأدب والمـروات=كلمة شرف عيبٍ على من جحدهـا
خيلِ وميدان ومـدارس وهقـوات= وموارد الجـزلات فكـري وردهـا
بمسابقة شعر البيـوت الجزيـلات= باسم العرب وأسم السديري سندها
ذكر السديري بيننا حي مـا مـات= شعـره مخلـد والمراجـل بجدهـا
أمير شاعر جزل وأشعـاره أثبـات= شاعـر حكيـم ومفرداتـه فردهـا
محمـد الأحمـد زبـون الونيـات= وافي وكـم قمـه بوقتـه صعدهـا
خال الملوك أهل السيوف الصقيلات= اللي تقيـم أحـدود عـزة بلدهـا
اللي لهم في كل الأحـداث وقفـات=أحـداث معروفـه وكـلٍ شهدهـا
يشهد على قولي مواقـف وقـادات = للعزوة اللي ما خسر مـن قصدهـا
آل السعود أهل القصور المنيفـات=الله يدمـر كـل شخـص حسدهـا
شاعر سعودي والفخر والطموحات= افدي ثرى ارضىٍ ما تخون بولدهـا
المملكـة دار العـدل والسياسـات=والأمن والإيمان ذي مـن عمدهـا
والبارحة ما بين صوله وجـولات= أحدث فالسابـق تناقـض جددهـا
ريموت فكري لف كـل المحطـات= يبحث عن أشياءٍ مبطيٍ ما وجدهـا
أشيٍاء ما تعرض في محيط القنوات=ومن كثر ما يبحث لها ما رصدهـا
قام يتجول بين الأحياء والأمـوات= ويبحث عن الحاجات شخصِِ فقدها
عشنا وشفنا فالزمـان أختلافـات= من كثرها ما عاد نحصـي عددهـا
عشنـا تقلبهـا بليـا خـيـارات= نجهل وناستهـا وعشنـا نكدهـا
أشيِِاء تعكر صفوة الفكـر مـرات= تفرض علينا ذي مع اللـي بعدهـا
وتحجب روايات وتظهـر روايـات= وتموت بعض أحلامنا فـي مهدهـا
وما بين تحقيق الهدف والمتاهـات= شفنـا هقاوينـا ضعيـفِِ جهدهـا
ومن لا يفيدك حي ما فاد لا مـات= هذا الصحيح وكلمتـي وأعتمدهـا
ومن صد عنك في جميع المجـالات =عيد على فرقاٍِ مـا حـيٍِِ حمدهـا
تلقـى بفرقـاه السعـد والملـذات= وقربه مرض عينٍ يخـوف رمدهـا
والعمر يقضي والليالـي مسافـات= ويقرب وعد نفسِِ ما تعرف وعدها

صــــــــــــــــــــــــح لســــــــــــــانــــــــــكــ
ومو غريبه منك الابيات الجزله لانكــ شاعر كفو وجزل
وتقبل مروري
اخوك
مشبب الدوسري