سمعت باخبار الضحى يوم الاثنين=علم و ليتي ما سمعته و لا بان
علم تكدّر خاطري منه و العين=هلّت عبايرها و زادن الأحزان
موت الامير اللي توفى على الزين=راعي الجمايل و المروّه و الأحسان
محمد بن احمد على العسر و اللين=وافي مع الوافين في سر و اعلان
مرحوم يا ريف الضعوف المساكين=يامنهل يعتاد له كل عطشان
بحر الندى كل العرب عنه دارين=عرق الوفى ولكل ما قلت برهان
يا زيد سلّمنا وبالحق راضين=وكثر الحسايف زود هم و نقصان
أنتم عوضنا فيه ما دام حيين=ما ينهدم بيت له اطناب و اركان
و الموت اخذ ادم وكل النبيين=امر كتبه الله على الإنس و الجان
الرجل لو يلبغ من العمر قرنين=لابد من فرقا الاخلاء و الاوطان
دنيا كفى الله شرّها غدرها شين=كل شكى منها على طول الازمان
و الله ما انسى رفقته لو بعد حين=لأجل الصداقة و المعرفة لها شأن
الله يلهم لاسرته و المحبين=حسن العزا و الصبر يوم القدر كان
وعسى إلى نصب القضا و الموازين=تثقل موازينه بعفو وغفران