يامحــلل المــوقـف نـبي مـنك تحــليل= وش خـطــة في خاطــرك تـعـتـمـدها
ذاب السـلام وصار مسرح وتمــثيل =سجدة سهو تاجب على من سجدها
ما في الـحـقـيـبة للعـروبـة محاصـيـل= ســوالف تصــدى الكـبود بكــبدها
وش منطق الأجيال من بعد هالجيل =يـاحـســرة الـتاريــخ وامـــر وادهى
الله وانـا سـائـلـه يــدمـر إسرائيل =ينـشي غـضب ربـي عشاه ويهجدها
تلقـح بسـحب مــثل حمـر الغرامـيل= عـــج مــطـرهـا والــزلازل رعــدها
تمطر سـخط منها الصـواعق نوازيـل= يــزفــر هــواهـا ويـتـسـلـخ بــردها
يجــتـثـها الــرحمــن بجـنـاح جـبريــل= وتـصـبح مــعالم للــعرب من بـعدها
تكــتب عـلى الخـنـزيـر طـه وتـنزيل =يانجــس مـبـداهـا ومـكـبر حــقـدها
والله جــريمــة منــكرة يا رجاجيــل= حــتى الـدول باعــرافـها تـنـتـقـدها
الصـبح فـوق كـلابها تـلـقى الانجيل= جــرثـومـة دب المـرض في جــسدها
اسـتـفحلت واللــي علــيها مـهابـيل= قامت عـلى انـقاض الخـيانة عــمدها
مـن الـفـرات بخـارطـتـها إلى الـنـيـل =عـــصابــة تـسـرح وتمــرح وحـدها
عنـها الصـواب بعيـد جمـلة وتفصيل= عـمــيانـة في غــيـها عـــن رشـــدها
هـي مصـدر الإرهاب وام الأباطيل =لا وفـــق الله مــن يـقــوم بـســندها
عقرب ثرى مسمومة الراس والذيل =مــن حــر ما فـيـها تـنـفـخ غــددها
عاشت على الكذبة دعاية وتضـليل =جـاهـا فـــناها يـــوم ربـــي قــردها
مـن حارب الله لـه مهـونه وتـذلـيل= في سـاعــة مـن غــيب لا تـبـتـعـدها
ألم تـر كـيف اهـلك الله هـل الفـيل= دك ابــرهـه وجــيوشه اللي حشدها
جاها الجـزا الصـارم عقوبة وتنكيل =ويــنـه و ويــن اصـنام رجس عبدها
شافـت فلسـطين الجـريحـة بـهاذيـل =شابـت قـضـيــتـها وشــيـب ولـدها
خمسين عام عـلوم صحف ومراسيل= في حــالها عـن حالها مـن نـشدها
مــراوحــة باقــدامــها في المحـابيــل =عـــن راسـها قـام يـتـقـطـع زبــدها
إلى مـتى تصـبر عـلى الظلـم والويل= تـب عـلى مـن هـانـها واضــطهدها
تبـكي وتغــرق بالـدمـوع المنـاديـل =تـنـخى فـهـد تـنـخى فـهدنا فـهدها
تـبي صــباح بــه صـيـاح وتـهـلـيل =يـقـضي على الفـتـنه وهي في مهدها
بـقـوة الايمــان حــنا هــل الخــيـل= الالـــويـة باســم الجـــهاد نـعـقـدها
بالحـرب نـثـبت في وجيه الاساطيل =مــواقــف مـن شـافــها ما جـحـدها
حنا الـعرب حـنا الرماح الـنوازيـل =نـضرب على قـمع الرصاصة زنـدها
مـن حـبنا للـموت نهـذي الهـواذيل= والـنفس قـبل تمــوت تاخـذ سـددها
إلى ادبــر المــهـزوم حـنا المـقابـيـل= كـم وقـعـة شـعب الجــزيرة شهدها
ولا نـولي الزحف نزحف جحافـيل =جــحافل الــتوحــيد في راي اسـدها
بـقـيادة اللـي يركـي المــتن للشـيل =عــنا ثـــقـيـلات المحــامـل صــمـدها
فهد فهد .. ضـير بشرب الفناجيل= إلى ابــرزت دهـم الجــموع يـعمدها
حلال حيـلي الحـلاحـيل حلـحـيل =يحــلــحل اللــي ما تحــلـحل عـقدها
دلـيلنا وان غـاب نجــم الـدوالــيل =عـلى الهـدى ديــرة مـساره رصـدها
نـفـداك وانـصـى الـرشا بالمحاحـيل =ياللـي حـفرت لـدفن الاعـدا لحـدها
معك أمة الإسلام تصهل تصاهيل= قدها يـبو فيــصل إلى الـقـدس قدها

المجد صافـح ياوطـن مستحيلـه=يامنبرالعـدل العظيـم ووصـولـه
عليك آمن مجيـب دعـوة خليلـه=ربٍ ملائكـة السمـاء سبحـولـه
قيادتـك دوحـة ذراك الضليـلـه=وشعبك عمى عين المغلّ وذهولـه
والعهد راسخ بالجـذور الأصيلـه=بصدرونا تخضر سنابـل حقولـه
عهـدٍ تبنّـوه الرجـال النبيـلـه=أحفادهم عبـر الزمـان احتمولـه
وفيض الولاء عبر السنين الطويله=المجد يشهـد بـه قبـل لانقولـه
عز الوطن شعبـه قناديـل ليلـه=من شامخ أقصاه لرحابة سهولـه
حنّا الوطن مجـد وكيـان وقبيلـه=حنّا الوطن شعـب وقيـادة ودولـه
حنّـا سواعـد محتميـن الدبيلـه=صغيرنـا واللـي بسـن الكهولـه
حنّـا التفانـي والتلاحـم وجيلـه=من قمة الهيبـه لمهـد الطفولـه
حنّا الولاء والأنتمـاء والفضيلـه=حنّا الوفاء عز وعقيـده وطولـه
صفٍ كما البنيان ساسـه يشيلـه=تعجز خفافيـش الدجـى ماتنولـه
وأرض الحرم والمجد الأول وخيله=مثل الأمانـه بالصـدور محمولـه
أرض السلام أرض الرسول وخليله=أرض الكتاب الحق مهد البطولـه
أرض القيم وأسمى الشيم والنفيله=أرضٍ بها للمجد صولـه وجولـه
أرض الكرم رمز أتحـاد الفصيلـه=تاريخهـا بالـدم نكتـب فصولـه
شعبٍ رمـوزه بالـولاء تعتزيلـه=مازعزعـه فئـة ظـلالٍ جهولـه
الياأنتخينـا للهنـوف الجميـلـه=عنها تعـود الطامعيـن مخذولـه
( شامان) رمزالمجد يسمع صليلـه=في شذرته سـرّ أنحـاه ونحولـه
و(الأجرب البتـار) يسنـد مثيلـه=في هيبته معنى الصمـود ومثولـه
و(أسم الجلاله) والجواد وصهيلـه=رمزالفداء تاج الصدور الزعولـه
بالله وثم سيـوف نجـد الصقيلـه=نملك زمام المجد عرضه وطولـه
بالله وثـم المرهفـات النحيـلـه=الشـرك والتكفيـر ندحـر فلولـه
نبراسنـا اللـي عزنـا ينتميلـه=المصحف الطاهر وسنـة رسولـه
نهرٍ شربنا العـز مـن سلسبيلـه=دونـه يديـن العابثيـن مغلولـه
الله هـو اللـي رؤسنـا تنحنيلـه=خوف ورجاء نطلب رضاه وقبوله
لارب غيـره لاخضـوع لبديـلـه=لو زمجر المأجور وأسرج خيولـه
رؤسٍ تحـاول زعزعتنـا ذليلـه=لو حربها المشئوم دقـت طبولـه
زمرة ابليس أرباب فكـر الرذيلـه=اللي جميل أهل الجميـل جحدولـه
على قيمنا أهـل الخيانـه دخيلـه=رؤسٍ ذليلـه خاويـه ومغسولـه
أضلّهـم رأس الفسـاد وعميلـه=وعلى حوانيـت الخنـاء طبلولـه
وأن ماخزمنا اللي يشـب الفتيلـه=حتى علـى حتفـه ينـوّخ ذلولـه
يحـرم سنـام المجـد ماننتخيلـه=لـو محدثيـن البلبلـه شوهولـه
دمٍ تساقـاه الـصـدور العليـلـه=عرقه على أيدينـا فنـاه وذبولـه
نقطع نماه مـن الجـذور ونزيلـه=حتى تفيق عقول مـن صفقولـه
حزب (أبرهه) وأنصار فكره وفيله=ظلل أبليس أفكارهـم وأنصتولـه
والفاجرالمأجـور يبقـى حصيلـه=أرواح مـن غرربهـم وأذعنولـه
نحيا لعـز اللـي نمـوت بسبيلـه=أعظم علـم رواد نجـد ارفعولـه
حنّا سما المجـد ومـداه ودليلـه=من جوخة المهد لشموخ الرجولـه
والأنتماء ماهـو جديـد ونحيلـه=غرسٍ مع الروح إيتزامن نزولـه
عهـدٍ ثنوه أهل الوفا تحتميـلـه=بأصدق ولاء ماخيّم الشـك حولـه
عاش الوطن عاشت مصابيح ليله=من شامخ أقصاه لرحابة سهولـه