دار الزمان وفرق الشمل ياعيد=وصكت لياليها مع ايامها السود
وقلب العنا ياعيد ذاق التناكيد=من مدة ياعيد والقلب ملهود
وهواجس ياعيد ليه معاويد=لاراح هاجوس يجي فوج بردود
والعين ماذاقت حلاة السواهيد=اسهر وخلق الله هجاع ورقود
من حاجة ياعيد صارت سراميد=قصه تشيب راس طفل ومولود
خمسة سنين والبلاوي ملابيد=ومن وين ماوجهت والباب مردود
بوسط البشر لاشك مامن مواديد=عدي وحيد يافتى الجود مفرود
كل ماشكيت الهم مامن سواعيد=وكل مارجيت الرد فالرد بصدود
بوقت الفضا ربع لسنها حواصيد=ولاصار وقت الضيق مافيه منشود
رحت اشتكي همي لصم الجلاميد=وهلت دموع سيلت فوق جلمود
ورحت اشتكي همي لخضر العناقيد=وحتت ورقها وايبست كل عنقود
ورحت اشتكي يم الطيور الجواريد=ولقيت لي حر على راس عمرود
وشرحت له قصة بلايه بتحديد=وضحتها ما فيه نقص ولا زود
قال افتهم مالك بكثر التناشيد=عليك باللي راعي الفعل محمود
عليك باللي يندبونه بابو زيد=محمد الأحمد زبن كل مضهود
يم السديري هو زبون الاواليد=أزبن عليه وكلها سهود ومهود
مع آخر الكلمه كفخ دور الصيد=في لحظة من دونه الشوف ملدود
وقعدت في رجمي اجر التناهيد=وهليت دمع حرق الجفن وخدود
ذكر عليه من حوى كل تمجيد=شيخ وفعله له براهين وشهود
ما يدري انه راح من دون تعويد=ما يدري انه داخل القبر ملحود
وهاضت شجون لاجيه بالحواديد=وبيحت ما فيه وما كان مقصود
(لو السديري حي)صارت سماهيد=وتبدلت حال العسر صارت سهود
مرحوم يا حلال عقد مجاويد=يالله عساك بجنة الخلد مخلود
بجاه الذي محيي عروق هواميد=الواحد اللي مجري السحب والنود
يا مهود الصعبات بالحيل تهويد=ويا باذل للطايله كل مجهود
وكم من سجين معتقه قبل تقويد=وحلال صعبات مفاتيل وعقود
وكم اسرة عقب الحزن بالزغاريد=عمت فرحها والسبب منك بالجود
وكم من ضعيف ذاق مر اللواهيد=ومن يوم شافك ودع الهم والكود
ويمناك اكرم من مزون رواعيد=اللي ليا هلت حيا يابس العود
قلت المثل واصبح له الفعل تاييد=ويبقى لياما الخلق يسعى بها الدود
(القصر لو زان المباني بتشييد=يا صار ما له ظل يا عل مهدود)
(يا صار ما هو مدهل للاجاويد=وملجا لمنه يشكي الضيم محدود)
والله فقيده يا زعيم المعاضيد=فقيدة للطيب يا مفني القود
ليتك لناحي وناتي تفاديد=نأتي لكم يا كاسب العز والفود
قلته وصوتي له ربوع ورواديد=وكثير من مثلي تمنوك موجود
انشهد انك من رجال صواميد=منه زبنهم زابن عالي الطود
قليل من مثلك عوين المضاهيد=في وقتنا اللي صبح الطيب مفقود
وجدي عليكم وجد من جاه تأبيد=ومن بعدها بلغ ترى الصبح مقيود
صدر به الاعدام ما فيه تمديد=مع شعة الاشراق بالسيف مجرود
وصاحوا عياله صيحة ليلة العيد=من سمعها وقف على الحيل مشدود
وحريمته واللي رضيع على الديد=عافت ولدها وجرت الثوب مسرود
وامه ومن جاها الخبر شي تأكيد=ماتت ولحظتها لحق دربها العود
هذا وجودي والمثايل شواهيد=عليك يا سيف مقاطيع بالود
والله لولا العيب وادرا المناقيد=لا صيح باعلى الصوت لا شك منقود
ونزلت انا من عالي الرجم يا عيد=ورجواي باللي وامر الخلق بسجود
انه يسويها سهود وسماهيد=الواحد المعبود هو خير معبود