أنا لك والزمن لاتشيل همه=فداك اللي مكانك وسط عينه
أشمك ورد وأحلى ورد أشمه=من أنفاسك شذاه وياسمينه
لذا معذور قلبي يوم دمه=بديت تزاحمه لطف وسكينه
عيوني تخطي النوم وتخمه=بدونك حالتي والله حزينه
أحس الكون خلي ما فيه أمه=أحس الدار موحوشة وشينه
بعد ماكانت من الناس زحمه=كئيبة هالشوارع والمدينه
تصوّر طفل محروم ٍ من أمه=تصوّر كيف عايش في سنينه
فلا هو عاش مع خاله وعمه=ولا هو في رعاية والدينه
حبيس الهم والحرمان سمه=ودمعاته مابين فينه وفينه
ربا بأحضان من لا فيه رحمه=وعاش بدنيته مثل الرهينه
هذاك الطفل في حزنه وغمه=وأنا قلبي عليك يشكي ونينه
أعرفك زين بك عهد ٍ وذمه=ولك بين الملا صورة حسينه
فلا تجعل حياتي تكون نقمه=ولكن .. حس بي شوق ٍ ولينه
عليّه طلتك خير ٍ ونعمه=فلولا البحر ماسارت سفينه
دقيقة .. وماتقوله في متمه=كلامك يسلب عقول ٍ رزينه
خذيت الروح وخفاق ٍ تضمه=وهان العمر لك وأشياء ثمينه

صح بدنك أخي الكريم سفير المعاني
وتشرفت بهذه الكلمات من شخص غالي على قلبي
تحياتي لك وشاكر مرورك وتواصلك

دمت بخير

اخي محمد
صح لسانك
قصيدة جميلة
واسلوبك امتعني
في المضامين وفي القوافي
تحياتي لك