الشعر بندق والمضامين بارود = والصدق مبدى والفخر فاح نده
أبوي رباني على العز والجود = نسل الحرار اللي حفظ طيب جده
وأخوي عزي بالمواقف له شهود = والحر الاشقر ينعّرف من مهده
ريـم الـنـواظـر والـوفـا ماله حدود = هاجس حروفي يستثيرك برده
قمة شموخي بين حاسد ونمرود = ما تنحني للي عزومه تضده
قصيدتي : عادات وسلوم وعهود = مضمونها ماكل شخصٍ يعده !
أبيات شعرً تعتلي شامخ الضود = وتجارب الايام سيفٍ نحده
هتان فكري كنه الغيث ممدود = وموج البحر لاهاج محدن يصده
قالوا ترى المعروف والصبر محمود = مع دورة الايام تلقى مرده
كم طيبٍ بعيون الانذال محسود = وكم غاديٍ ماطاع منهو يوده ؟
لا عاش راسٍ يلحقه كل منقود = ولا عاش قلبٍ بيّح الوقت سده
أقولها وأنا من الضيم ملهود = وهاجس خيالي بين جزره ومده