الليالي كل يوم ً رحاها تستدير = ناس ترفعها وناس ً تذل ارقابها
ماتخلي من نكدها كبير ولا صغير = كل من جرب حلاها يذوق اتعابها
كل ما اقول اضحك الوقت والدنيا بخير = شح بالافراح وقتي بعد ما جابها
يوم قالت لي بسافر والا ادري وش يصير = كأني اونس حربة ً ساطي مضرابها
ولوعة الفرقا لو انه على وقت ً يسير = انشد اللي جرب اضروفها واسبابها
لو اقول ابخير عزالله مأني بخير = كن روحي تنتزع لا ذكرت اغيابها
ولاذكرت الاآمها اللي من الجرح الكبير = ينفلج قلبي عليها عقب ما صابها
ولاذكرت اد موعها اللي تسابق في النظير = لين صارت عينها ماتجف اهدابها
ياملاك الطهر ياهمسة فوق الاثير = يا تراتيل تجي الروح في محرابها
يا ندا ياتي من البعد غير وشكل غير = سيفونية عشق ماحد قبل غنابها
يا اية الراهب يافخر النسب عند الامير = سرمدية عشق ما ينتهون احبابها
ياشموس في فلكها تدور وتستدير = يفرحون الناس بفصولها وحسابها
انتي احلا بسمة في ثغر طفل صغير = كل ما امه ضمته قام هو وجابها
يحني صدر الزمان لحضورك مستجير = ويكتب اسمك في شموخ العرب وانسابها
يا سحاب يسقي الارض باليوم المطير = امطري لارض ً جفاف الدهر بترابها
وازرعي نبت المحبه على جال الغدير = لين تعشوشب مشاتل تفوح اطيابها
كنت اضني صاحب الشور والعقل الكبير = لو تمره بعض الاوضاع ما يشقا ابها
لين قام يقودني يمها سلك الحرير = قمة ً تأسر الى المجد قمت ارقابها
ليتني من بعضها في كمالي مستعير = من سموً في أساليبها وادابها
اصبري بلقيس قدام عقلي لايطير = لين اقول السالفة قبل لايدرا ابها
اسمعيها لاجل لا مت مرتاح الضمير = يوم كل مناسبه تقفلين ابوابها
حيث انا من كثر ما اصمت تحملت الكثير = لين صرت بحالتة ً ماحد ً يرضى ابها
ايه احبك لو يجيني عذاب ً مستطير = واتحدا لجلك اخطارها وصعابها
دام تبغين الحقيقه هذا العلم الاخير = كيف اضيّع فرصة العمر والله جابها