ياربعي اللي تهتوون المطاريش=معكم يبيلي بأول الصبح مغباش

فرصه وادوّرها بروس المناقيش=راسي من التفكير والهم منداش

والله ما ادري ليش والا على ويش=لكن صدري من عنى خاطري طاش

تكفون لا نامت عيون الخفافيش=ودي بمطراشٍ ماهوب اي مطراش

على ابيضٍ من جدّته مابعد نيش=ومن زود قدره سايقٍ قيمته كاش

وإذا فهقنا ( جو ) عقب التفاتيش=ثم جاتنا لوحة جفن ضب ومشاش

سوقوه لديار الرجال المداغيش=أمثال أبو ماجد وفالح وعكّاش

يفداهم اللي يلبسون الطرابيش=ويفداهم الهلفوت والنذل واللاش

هم شوق من تزهاه سود العكاريش=كم واحدٍ في ظلهم بالهنا عاش

نبي نسج الرجل فالخبت ونعيش=ساعات نقضيها طرب بين الأدباش

في عبلةٍ فيها الخزامى مداقيش=والجو غايم برق مع رعد وارشاش

تبري الكبود الضاميات المعاطيش=شوف الخزامى والنفل يبرد الجاش

قد قيل راس الظبي مابه عراميش=لكن نعيش العمر غربه ونعتاش

هو ليش مانقنع من الوقت هو ليش=وقتٍ سيعنابه ولكن على ماش ؟

ودام المهبل في عماهم مخاييش=وإذا لفى واحدهم العلم ينحاش؟

خلوني أحيا باقي العمر واعيش=بين الصحاري والفيافي والأدباش

هو ليش مانقنع من الوقت هو ليـش
....................وقتٍ سيعنابه ولكن علـى مـاش ؟