واعذاب المشقى من فراق الهنوف=قلب يا اللي من الضيقات ماهو خلي
كثر ما صادفنّك في حياتك صدوف=ذي ثلاثٍ تتالى كلّها تقتلي
لا تشاليت من وحدة للأخرى تحوف=أشهد إنّك من صدوف الزّمن ممتلي
جيت تبغي تطوّفها و عيّت تطوف=وقّفت وقفةٍ منها الفواد يغلي
من سبايب غريرٍ مدّ لي سلك صوف=قوووم يا كيكة ابن فطيس مدري جلي
أتلعٍ ناف عن كل المزايين نوف=ما لوصفه شبيه ولا لطبعه حلي
لو يلد النضر صوب العذارا عيوف=ما لقى له من أطلقهن جليس و سلي
لو بأوصّف لو إن العذب فوق الوصوف=العذارا دداسن و الغضي بنتلي
خابر إن التّعب معها مهوب امخلوف=خصّ لا عوّدت عقب المزوح صملي
لا سقى الله علي ليلٍ حدته الظروف=يوم جتني و قالت لي درو بي هلي
وأرخت الرّاس و أغضت لي بعكشٍ صفوف=واختفى صوتها و الدّمع هل سبلي
وقربت و شبكتني شبكةٍ بالكفوف=وقتها ضاع عقلي مع سواد جهلي
قلت يا بنت ما لي عند غيرك شفوف=كيف ذا الغمّة اللي بيننا تنجلي
والله إنّي ما بي دربٍ ماهوب (امعروف)=و الدروب الضعيفة ما قربها شلي
قالت عيال عمّي يا مبارك جلوف=حاجريني من أدنى كلّ منهم ولي
كل منهم قطوعٍ صارمٍ ما يروف=جعل ما هو نصيبي من نتاج عملي
قلت و اليوم قالت مثل مانك تشوف=استر الله يبيحك ما خذيته علي
وادعتني .. و أنا والحظ الأقشر وقوف=مع خفوقٍ من الضيقات ماهو خلي