زان وجه الشوارع بعد هل السحاب=وقام يلعب من الفرحه جريد النخل

وطشت الارض ملبوس الزعل والعتاب=ولا بقا في مناكبها عتاب وزعل

كنها يوم تبديلي طوال الرقاب=دوب تمشي من الشبعه وثقل الحمل

برقها ينشد وهزت رعدها جواب=وهزته تنثر الما فالجبل والسهل

وقامت الارض تشرب سيلها بانسياب=لين رويت وباقي سيلها مانزل

وقام يمشي على شعبانها مايهاب=إيتداحم ويزبد إزبدان الفحل

والحزن عن وجيه الناس ولا وغاب=عقب فضل الكريم الفرد عزّ وجل

وكل إنسان طايع خر ساجد واناب=يشكر الله ودمعه للرحيم انهمل

ياحمد ذي طرات العمر شيب وشباب=طاعة الله سبحانه بحسن العمل

وسجت الرجل مابين السهل والهضاب=لاختلط ريح الارض إبقحويان ونفل

احسن من المدن والضيق والاكتئاب=والعلوم الخفاف اللي تغث وتعل

تالي الوقت يازين الغتر والثياب=والعقال المتين اللي ماتحته عقل

قد عرفنا مثايل طيبين الجناب=اللي اقولها تنسف جميع الحيل

ماتبنّا بيوتٍ ساسها من خراب=ولوّ بنيت ليا جار الزمن ماتظل

وماجحدت الرجال املينين الصعاب=بالسياسه وحسن اخلاقها والثقل

مير يانجد طيبي عقب نو السحاب=ماتوصف وصوفك رسمنا والجمل

احسن الوصف تصويرك بوسط الكتاب=الحقيقه هي احسن وصف خل الجدل

مير يانجد طيبي عقب نـو السحـاب
......ماتوصف وصوفك رسمنـا والجمـل
علي بن عامر