سيّدة عقلي رضت والا زعلت = من غلاها شايفاً معروفها
اقنعت سلطان عقلي ونزلت = تستضيف القلب ضمن ضيوفها
كل ما يرخص سواها هي غلت = مغلياً حتى اسمها وحروفها
وكل ما شانت سواها هي حلت = في عيوني تنفرد بوصوفها
هي جميلة خلق ما تجمّلت = من مساحيقاً غلي مصروفها
طرفها مكحول ما تكحّلت = عيطموس وضامراً سرجوفها
ما حلا كان ادبرت والا اقبلت = اعتدال وميلها بردوفها
تفرق القذله اثنين وعدّلت = فوق قذلتها طرف نفنوفها
روعة البرقع عليها كمّلت = سطوة النظره وحد سيوفها
لجلجت بعيونها ثم ارسلت = نظرةً لا زلت اعيش صدوفها
سلهمت سود الرموش وحلّلت = انتزاع القلب من ملهوفها
زيّن الشيطان ذبحي وفعلت = شفت قلبي ينتفض بكفوفها
السنين بوصلها ما طوّلت = مابقى الا حبها وطيوفها
الليالي نزّلت روسً علت = ترتجف كل البشر من خوفها
والعواذل عارفه والا جهلت = القلوب اسعادها بشفوفها
كانها عن حب مغليها سلت = ما جفتني واجبرتها ظروفها
من هذاك الوقت وسنيناً خلت = ما نسيت ولا قدرت اشوفها

المشاركة الأصلية كتبت بواسطة خلف العاطفي (المشاركة 268316) عبدالله الشمري طبت وطاب فالك وصح السانك مبدع اينما وجدت

المشاركة الأصلية كتبت بواسطة الغناوي (المشاركة 268320) عبد الله الشمري صح السانك بكل امانه اسمحلي اصفقلك :ta_clap:بكل حمااس مبدع ولاهو غريب على من يكتب مثل هاذا النص

المشاركة الأصلية كتبت بواسطة عبير (المشاركة 268324) عبد الله الشمري صح لسانك ولاهنت تحياتي

المشاركة الأصلية كتبت بواسطة صمت انثى (المشاركة 288580) مبدع وماهي غريبه عليك القصيده ابداع وتقبل مروري