ياحلو برد الشتاء لاجت مواريه = تاتيك الافكار وانت تراقب امطاره
امطار عاما وقبل العام عاديه = وامطار ذا العام جات تبلغ اخباره
شعب الغلا اللي ثلاث سنين واديه = ماسال سيله وماتت جرة اشجاره
شعبٍ من القفر قفا عنه شاويه = يبس الكلا به ويبست كامل ازهاره
ياقوة الله بعد جفت مناشيه = يومض له الغيم برقٍ يشعي اقفاره
ياصاحبي حي علمك وانت راعيه = والعلم عند المريض يقدر زياره
ان كان قصدك زماني ويش ماضيه = فمن حطت ايديك ماتسلم من افكاره
جروح وقتك على علباي ماريه = ذوقتها من فتوق الموت قنطاره
اخاف لاقبل سواد الليل عاميه = واراقب الصبح تشرق طلت انواره
اليا شعا الصبح نمت وزاح مافيه = من وحشة اللي جرى في الليل واسحاره
ولا عود الليل وانسدلت غطاويه = عودت في روعته وازريت بوزاره
وان جو هل الونس في ساعه خطاويه = ماجو معي كل وقتٍ حنت باسراره
وحيد وعيون ماتغفى شقاويه = وهموم وافكار مغلوطه ومنهاره
افكار طافت من حدود الخياليه = اصيد حوت البحر فيها بسناره
واحلام لاوردت جتني رماديه = اشوف قصرك وانا والموت باسواره
ياصاحبي كل ذنبٍ عند باريه = والله وكيل البشر في دبرة اقداره
لاحدن يقدم على الثاني دعاويه = الكل له يوم والايام دواره
وافكاري اللي مع برد الشتا حيه = انهيتها عقب جات وراحت امطاره