![]() |
السلام عليكم اليوم القصه تختلف عن سابقتها وكالعاده زهم علي الشايب صديقي الصادق وقال تولم الجو زين ونبي نروح قلت له حاضرانا جاهز اذا وصلتني دق علي وانزل وصل ورحنا للمنتزه كالعاده وجاز وجانا رفيق لنا واخذنا طلباتنا وبعد ذلك شويبنا جاز له الجو وريح وكانه نعس او يهوجس ماهو لمنا ومغض بعيونه وسرقت محفظته ولم يحس وكان فيه شجر يحيط بالجلسه واخفيتها فيها المهم تقهوينا وعينا من الله خير وانا اظهر محفظتي واج ابا اشاور على المحاسب وهو يطلق انك اليوم ما تحاسب خل لنا فرصه قلت امرك وهداية الله واذا رفيقنا الثاني شايفني وانا اخذ المحفظه وكذلك يوم احطها بالشجره واثره تغافلني واخذها وقال لي والله ان تركب معي ابيك بموضوع واوصلك بيتك قلت لا الشايب يزعل قال الشايب مدام الرجال حلف مسامح وانا ابجلس احلل قروشنا بذا الجو الحلو ومشينا من عنده قلت اذا جاء يبي يحاسب ما هو لاقي محفظته ويبي يخترش واهل المنتزه ماهم تاركينه يروح الا مسدد ويبي يزهم علينا وابا اداعبه ثم اقول دور بالشجر اللي حولك ويبي يلقا المحفظه حيث انه ليس لي علم بان رفيقي اللي حلف علي اركب معه لاطشها وظهرنا من لمنتزه قال ابا امشيك شوي قبل ندخل للبلد ونسولف وبعد ربع ساعه اذا الشايب يزهم ويصيح ويقول محفظتي ما لقيتها وانا متأكد اني شايلها من البيت واهل المنتزه يقولون لابد تدفع تكفون ارجعوا لي انا في موقف محرج قلت مدامك متأكد انك جايبها دورها حولك طايحه او بالشجر قال دورت حولي لكن يا خوفتي ان احد العمال اللي يخترشون سرقها وانا نايم ورجعنا وادورها بالمكان اللي وضعتها فيه ولم اجدها وانا اناظر لرفيقي اللي حلف علي شكيت انه اخذها قلت له ياشين المزح يا ابو فهد قال وشو مزحه قلت اظهر محفظة الشايب وهو يضحك وينكشف لنا انها معه قلت له حرام عليك تفجع شايبنا قال انت اللي فاجعه قال لا والله ابو محمد ما يسويها المحفظه معك وتقول انت والله ما يحاسب الا انت ويجي يحاسب والا بوكه ماهو معه ولا يدري وينه قال اكيد انه معك واحلف اني ما ادري عنه ولا اخذته قال تصرفوا وارجع مع اللي جابك بوكي راتبي فيه والله اعلم وينه ابا ارجع للبيت عساي ناسيه وبعد خمس دقايق وحنا خارجين بعد محاسبة اهل المنتزه الا وهو مقابلنا يضحك ومبسوط لقاه طايح وهو نازل من السياره بالشارع وفكه الله ما لقاه احد لانه بالمواقف وظلام ورجع لنا فرحان قال ابا احاسب قلنا وشلون تحاسب تبيهم يتركونا ما حاسبناهم توكل على الله ويحلف علينا ان بكره عليه قلنا بينا وبين بكره مشيئة الله ويصير خير وسلامتكم تقبلوا تحياتي |
هههههههههههههههههههههههههه
هههههههههههههههههههههههههههههههه اجل من حفره حفره طاح فيها وخويكم ابو فهد فكه الله والا صارت صدز ضيعت المحفظه خخخخخخخخخخخخخخخخ ابو محمد الله يسعدك ولاتحرمنا من هالمواقف الطريفه |
الغالي النداء الاسير اسعدني تواجدك ومتابعتك وتعليقك واشكرك من الاعماق ودمت بخير وتقبل تحياتي |
ههههههههههههه ياصباح المطبات :) والله يابومحمد أن ضياع المحفظه يوجع القلب اسأل مجرب :) وماهي مسألة فلوس الا هالبطاقات اللي فيها ربي يسعدك على هالمواقف وبانتظار الفلم القادم :) |
السلام عليكم امس حصل موقف لا يحسد عليه صاحبه حينما اوقفتنا اشارة المرور بضوئها الاحمر تقدم شاب للامام ووقف على خط عبور المشاة وكان يوجد رجل مرور بالقرب من الاشاره واشار الى الشاب بالرجوع وتلكأ الشاب بالرجوع واتجه رجل المرور الى الشاب وعندها رجع الشاب مترين وحين ولعت الاشاره خضراء رما الشاب كلمات لاافهما ويضهر انها مسبه وداس على البنزين بقصد الهروب بعد كلماته ماذا تتوقعون حصل اللي حصل ان الشاب لم ينتبه ان سيارته بالرويس وعلى دوسته البنزين عاد للخلف بقوه وصدم السياره اللي خلفه واراد الهروب مرة ثانيه ولكن صدامه الخلفي نشب بصدام السياره اللي خلفه ولم يستطع التمكن من الهروب وقبض عليه رجل المرور واذا بخلف سيارته منعدم وكذلك مقدمة السياره اللي خلفه وكم كلمة قالت لصاحبها دعني حيث ان طيش الشاب وتلفظه تسبب عليه بكثير من الخسائر ناهيك عن توجب اصلاح السياره المصدومه على حسابه وتدفيعه غرامات في حالة عدم وجود رخصه ومعاقبته على تصرفه الخاطي اللذي اوقعه ووصله لهذا الحد اللذي لا يحد عليه وسلامتكم تقبلوا تحياتي |
هههههههههههههههههههههه
عقب ماقريت هالموقف .. والله ياأني ضحكت ضحك هذا الظاهر من يوم رجع ريوس وهو معلق على الريوس :) والله اني اتخيل منظره وأضحك . خله يستاهل هالتعليقه .. جته من الله :) |
والله مواقف تضحك بجد
شكرا سفير |
الغالي استاذي عبدالكريم الضبيب الله يسعدك كما اسعدتني بحضورك ومتابعتك وتعليقاتك الف الف شكرلك تحياتي |
الغالي صغير بس خطير مشكور يابعدهم وانت من جد غالي تحياتي |
امس كنا معزومين باستراحه بضرما ورحت انا والشايب لزم عليه اللي عازمنا ويوم دخلنا واذا فيه ناس ما يعرفهم الشايب التفت علي وهو يهمس باذني قال انا ابا استاذن من صاحب العزيمه وانت دبر روحك قلت افا عليك تخليني انا خويك قال انت كلهم اخوياك قلت في نفسي لازم امنعه وافكر واجد الحل قلت ابو فلان قال نعم قلت له رح انا اعتذر لك من صاحب العزيمه قال الله يجزاك بالخير قلت ابد اركب سنام ونام بس لاتظهر قدام الناس واذا فيه حوش تابع للاستراحه وله باب على الاستراحه قلت قم اهربك ويفرح الشايب وانا اعرف الحوش فيه غرفه وفيها حمام صاحب الاستراحه بانيها وحاط دكه اذا اجر الاستراحه يجي ويجلس فيها فارشها وفيها ثلاجه وتلفزيون وتكرمون دورة مياه واجي والا مفتاحها عليها قلت هذا الباب يطلعك على الشارع ولف يمين وتجد سيارتك قال كالعاده اله يجزاك خير وافتح الغرفه وولع النور قال هذا هذا مجلس قلت ايه واشر له على باب الحمام تكرمون قلت هذا باب الشارع وهو يروح يتأكد وانا اخرج بسرعه واصك عليه الباب واخذ المفتاح معي ويوم وجد نفسه محبوس بس حبس حشمه كل شي عنده الخدامات كامله ولكن هو ما رض فكر واذا فيه مروحة شفط قام وفكها وشاف انها على الشارع قال اخرج معها وحاول يخرج وخاف اولا المخرج ضيق وومرتفع عن الشارع المهم رجع للغرفه وفتح التلفزيون وتمدد بغرفته وهو يلعن ويسب وما احد حوله سالني صاحبي عنه قلت راح يتمشى قال والعشى نبي نحطه قلت خذله منه وحطه بحافظه قال تكفى تعال حطله انت واروح معه واخذ له بالحافظه من احد الصحون واحط عليها كتف ونعيد الصحن كانه من طباخه قال صاحب العزيمه والله اني خفت يبان لو انا اللي حطيت ما كان واسيته والله يبيض وجهك قلت وجهك واخذ الحافظه قلت اروح لشايبي واكيد اذا فتحت الغرفه عليه يبي يصير زعلان ويبي يرفض الاكل وانا اجي لمه بالغرفه وافتحها عليه واذا هو جالس وفاصخ ثوبه ما عليه الا فنيله وسروال قال اقول قلت سم طول الله عمرك قال عسى ان تكرهو شي وهو خير لكم انا انبسطت هنيا قلت عسى والله الساعه المباركه قلت انا عارفك ما تبي مع الناس هذا العشى وانا ابا ارجع لهم يحطون العشى تبي تجي معي يا مرحبابك تبي تروح للرياض الف واحد اجي معه المهم انت حر قال لا ابجلس ولا تستعجل انا هنا مبسوط تلفزيون صاحبك يختلف عن تلفزيون بيتنا اجلس على كيفك لك الى الصبح والله وارجع وانتعشى وبعد ذلك غادروا الضيوف وما بقي الا انا وصاحب العزيمه قال بالله وين الشايب قلت موجود واصيح للخادم قلت يااكرم شف الشايب بالغرفه اللي بالحوش الثاني قال صاحبي لا حنا نروح له بالله ليه هو انعزالي وقال يااكرم الحقنا بالقهوه والشاهي ورحنا له وهو على جلسته ويوم شاف معزبنا وهو يختبص ويطفي التلفزيون ويشكيني عليه ويقومون على حق ذبيحه والله يعيني واللي منكم يبي يوسع صدره معنا الله يحييه بالاستراحه وسلامتكم تحياتي |
الساعة الآن 07:49AM |
Powered by vBulletin® Copyright ©2000 - 2024, Jelsoft Enterprises Ltd.
HêĽм √ 3.1 BY: ! ωαнαм ! © 2010
جميع الحقوق محفوظة لشبكة رهب الأدبية